政情：迪士尼義工幫學校扮靚
好多學校都會趁暑假翻新校舍，以配合莘莘學子九月開課。不過，有啲學校連基本設施都冇，好似上水育賢學校就有呢個情況，所以香港迪士尼樂園度假區就聯同慈善團體中華仁人家園，喺暑假期間為育賢學校興建戶外有蓋圖書閣，以及改善該校嘅電腦室設備，讓學生有一個更完善嘅學習環境。
既然係做善事，一班平時甚少落手落腳嘅管理層當然都不甘後人啦，好似香港迪士尼樂園營運副總裁侯諾保、華特迪士尼幻想工程創意發展及演出質量總監施志宏及一班幻想工程師團隊都唔怕酷熱天氣，齊齊喺校園牆壁髹上唔同種族小朋友嘅圖畫，認真有心思。
施志宏話，壁畫上唔同種族嘅小朋友，正正係想透過繽紛嘅色彩，同一張又一張燦爛嘅笑容，向喺度讀書嘅小朋友宣揚世界和平，放眼世界嘅訊息。有咁大班有心人整靚間學校，相信班小朋友會珍惜同努力讀書。