中環出更：世界廚王幫李錦記省招牌
喺全球華人萬千家庭廚房佔有一席地位嘅百年老店李錦記，早前曾邀請五位內地頂尖廚王組隊參加台北舉行嘅「世界廚王爭霸賽」，結果憑着創意佳餚奪魁，呢五位廚王尋日就齊集大埔李錦記廚藝中心表演獻技。集團主席李文達尋日帶埋兩位囝囝李惠中、李惠雄出席，展示以佢哋醬料入饌嘅得獎「意境菜」，省靚個金漆招牌。
五位來自內地嘅廚王，以中國烹飪大師屈浩擔大旗做領隊，其餘四位譽滿京城嘅年輕名廚包括北京大董烤鴨總廚石秀松、中國大飯店夏宮中餐淮揚菜廚師長侯新慶、北京孔乙己尚宴總廚陳慶及北京鮑魚王品鮮堂行政總廚李可，佢哋分別以多款醬料入饌，創作出冷盤、熱湯、熱葷等五大佳餚，獲得一眾國際食家好評，成功摘下「世界廚王」桂冠。
新派中菜新意境
擔任李錦記醬料集團主席嘅李惠雄話，今次比賽將佢哋百年醬料嘅精髓發揮得淋漓盡致，亦都帶出新派中菜嘅新意境。李惠雄已係第四代傳人，返屋企幫手近三十年，佢話集團嘅出口市場好大，粉絲除咗海外華人外，愈來愈多西廚鍾意將佢哋產品入饌，所以就算歐美經濟不景氣，都冇影響到生意。
身為第三代傳人嘅李文達，見到家族生意愈做愈旺，笑不攏嘴。佢話，想當年公司只係皇后大道中一間舖頭仔，伙記得十幾人，舖頭只得一隻鑊，煮得蠔油就煮唔到飯，產品亦都只有蠔油及蝦醬。今時今日，集團產品多不勝數，員工逾七千人，秘訣係乜？咪就係佢嘅座右銘「思利及人」，以及永遠創業精神囉！
卓妮