嘩嘩嘩！社會福利署呢鋪頭痕咯，事關法官大老爺連珠炮發提出質問，社署真係唔知點樣解畫，假如愈描愈黑就眼冤。
呢嗱，不如咁啦，先講講到底發生乜嘢事。有一位四十八歲女士林鳳開，被控未有向社署申報與家姑共同擁有八十幾萬元銀行戶口，期間領取由社署發放嘅六十幾萬綜援金，區域法院裁定一項欺詐罪名成立。本來呢，欺詐綜援確係唔啱，之不過咁，被告身世極度悽慘。
辯方律師求情時透露，被告一家五口依靠社署每月發放一萬多元綜援維生，○八年事件揭發後，社署即時停止發放綜援以及其他津貼，只靠被告做洗碗散工每月賺一千六百元養活一家，包括同樣有輕度智障嘅丈夫同十五歲幼女。
法官葉佐文覺得林鳳開好可憐，認為佢需要幫助。於是乎，葉官就質問社署，點解被告未被定罪前已停止發放綜援？點解連幼女嘅一千四百元傷殘津貼都停止發放？點解一人犯事，其他家人都受到牽連？如果大家唔明葉官因乜事幹質問，等功夫茶略加解釋。香港奉行嘅司法制度係「假定無罪」，任何人未經定罪都係清白之身，社署未等到法院裁決已經停發綜援，即係破壞法治精神，而且株連無辜家人，好大問題㗎！
葉官嘅質問未完㗎，佢仲問點解窮人詐騙綜援一定要判入獄，而高收入、高職位嘅人詐騙房屋津貼，歸還金錢之後就不必坐監？所以咯喎，葉佐文特別要求社署官員提交文件解釋相關政策。
講到呢度，功夫茶忍唔住要讚一句，法官大老爺你係得嘅！
喂，法律面前，人人平等，冇理由富翁犯法就唔使坐監，窮人犯法就要入獄啫，呢家嘢非常之咁唔公平。再講吖，富翁犯法通常係因為貪得無厭，而窮人犯法好多時候係為咗有米落鑊。好似林鳳開，詐騙綜援你估係為咗買名貴手袋出席豪華舞會咩？佢係為咗餵飽全家咋！
計功夫茶話齋，詐騙綜援一定係錯，不過判罰可以有輕重之分。如果詐騙綜援之後遊埠歎世界，絕對唔介意你重罰，至於窮等人家為咗一家溫飽鋌而走險，咁就望法官開恩嘞。
其實講到尾，唔該社署唔好逼死窮人啦，唔係叫你唔好杜絕詐騙行為，之但係未定罪就停發綜援仲要禍及無辜，簡直令人髮指！
香港好彩仲有葉佐文呢一種法官，否則餐餐都聽到權貴受保護、窮人輸甩褲，聽得多耳仔都生瘡。嗱，社署記住提交文件向法官解畫，唔好胡說八道呀，藐視法庭好大罪㗎！