政情：嫻姐落區 揀定戰場？
尋日我哋提到，考慮緊復出參與區議會選舉嘅工聯會票后陳婉嫻，今年可能遇上追撞事件，咁啱尋日嫻姐喺黃大仙東頭邨一帶現芳蹤，唔少街坊對嫻姐好熱情，甚至叫嫻姐復出，莫非嫻姐屬意循黃大仙東美區出選？
根據工聯會嘅部署，係安排嫻姐先選區議會，攞張入場券去參選區議會超級議席，不過佢去邊區選區議會，一直保持神秘。尋日晏晝兩點幾，嫻姐到東頭邨、美東邨同大磡村一帶探街坊。唔少街坊一見到嫻姐，就捉實佢投訴地區問題，諸如行人路要加上蓋、樹木枯咗無人理，甚至投訴地區設施殘舊都有，當中仲有人極力慫恿嫻姐出山，當然嫻姐只係話考慮當中啦。
據聞已經好一段時間無落區嘅嫻姐，未必會去其他區亮相，難免惹人遐想佢已揀定東美區出選。但佢去邊都好，都會招惹民主黨李耀基同「維園阿哥」任亮憲嚟追撞，總之佢去到邊，就熱鬧到邊喇。