政情：黃灝玄樂做吸塵先鋒
商務及經濟發展局工商及旅遊科率先搬入添馬艦，成為吸塵先鋒，身為工商科阿頭嘅商經局常秘黃灝玄Andrew，尋日執到正一正，為搬竇傾力演出，親證新政府總部大樓無問題。不過佢啲下屬就無佢咁好演技，唔少人行到新大樓附近，立即摷番個口罩出嚟遮住自己，到底係唔想上鏡抑或唔想吸塵，真係佢哋自己先知。
原先工商科位處金鐘太古廣場嘅辦事處租約期滿，令佢哋有幸定唔知不幸，可以成為吸塵先鋒。Andrew晨早乘座駕去到添馬艦，立即展現招牌露齒笑容，單手插袋昂然步入大堂，佢形容喺新竇返工好高興，雖然有啲小地方要執漏，不過佢唔擔心同事安全或者令同事變成吸塵機，一句講晒就係無問題，之後佢仲慢慢嘟卡入閘，全程任影唔嬲，以身體示範畀大家睇，呢個新竇有幾好。