政情：張震遠開腔撐 CY班底浮面？
身兼多項公職嘅市區重建局主席張震遠尋日開腔力撐疑似特首候選人梁振英（CY），話好認同佢喺房屋及貧富懸殊等問題上提出嘅意見，認為佢完全符合港澳辦王光亞開出嘅特首條件，仲大讚佢係特首嘅適合人選，咁高調硬銷好友，唔通張主席已被招攬做助選團要員，定係疑似候選人嘅班底陸續浮面？
張震遠喺市建局飯局上被問對特首候選人嘅睇法，佢話好認同應優先處理房屋、貧富懸殊同長者福利問題，認為邊個做特首都需要面對，「目前嘅疑似候選人中，只有梁振英發表咗意見，認同係需要解決，佢嘅意見好值得參考。」佢又呼籲其他疑似候選人盡快就三個議題表態，但總之就係對梁振英有讚冇彈，埋堆嘅味道甚濃。
張主席尋日又罕有地帶埋十七歲嘅細仔張緒德到場見世面，喺英國讀書嘅緒德啱啱放暑假返港，第一次陪爸爸返工，佢話覺得市建局嘅工作好有意義，不過會否繼承父業就言之過早，後年考大學嘅佢打算讀化學，同讀數出身嘅張震遠一樣愛好理科。