政情：fb貼諮詢錄像 煲呔曾攞架嚟丟

煲呔曾由尋日開始為施政報告做諮詢，第一場邀請港區全國人大代表，不過卅六名港區人大中，得十二人畀面撐場，現身率得三分之一，連人大都唔睇佢台戲，真係情何以堪。

逾半百留言 針針見血

講番煲呔曾個fb專頁，來自網上世界嘅反應熱烈得多。佢嘅諮詢片段面世一日唔夠，經已吸引逾半百網民留言鬧佢。一針見血嘅留言，包括網民「新安洲」話「八個字：意見接受，態度照舊」，下刪粗口數字，仲有「Kevin Li」嘅「冇諮詢到（都）唔緊要，最緊要認」，更能講出真相嘅，莫過於「胡國生」嘅留言「假諮詢；等收工！」自不然又有人叫佢早啲落台算數。

日前煲呔曾侃侃而談十大領袖條件，點知自暴其短，實情喺市民心目中，煲呔曾只做到「愛國愛港」一項。網民「蛇王威」別具一格，好有創意咁話「改『上亞厘畢道』做上阿爺嗰道算啦」，真係抵死啜核。總之見鬧唔見讚，呢度不能盡錄。

唔怕老實講，煲呔曾禍港殃民咗咁多年，以前網上平台無咁發達，好多人焗住啞子吃黃連；今時今日多咗咁多發聲平台，自不然搵機會鬧番夠本。最後大家不妨睇吓網民「Peter Wong」嘅留言作為總結，佢話「我想問：諮詢完畢後，有幾多成的意見是真真正正寫在施政報告中？」