中環出更：非一般師奶嘉玲Christofle掃貨
影壇一姐劉嘉玲同影帝梁朝偉結婚之後，百分百投入做梁師奶。行街Shopping，都以家庭為先買家庭用品。卓妮尋日撞正嘉玲喺中環Shopping，而佢買嘅家庭用品係高檔銀器，果然係非一般師奶！
暫時未有新戲開嘅嘉玲，尋日喺中環太子大廈現身，同助手走入法國銀器品牌專門店Christofle，時值晏晝三點，素顏嘅嘉玲穿上雪紡連身裙，拎住蛇皮手袋，大大個烏蠅墨鏡下，難掩星味。
揀20分鐘即扑錘
Christofle係歐洲皇室頂級御用銀器，具有一百八十年嘅悠久歷史，閒閒地一隻碟都要賣幾千元，嘉玲果然識貨，先睇銀碗碟及銀杯，之後再睇埋銀器餐具，顯得興致勃勃，似乎想揀番幾件精品點綴家居。
大客駕臨，店員主動上前畀意見，更遞上產品清單逐一介紹，嘉玲顯得好受落，揀咗廿分鐘，決定扑錘購入幾套餐具。店員好體貼，叫佢留低地址，遲啲將貨品送到上門。
Shopping完畢，嘉玲春風滿面離開。卓妮上前打招呼，佢直認買銀器送畀自己，佢話：「我屋企一向用開呢個品牌。」襯晒佢喺山頂嘅屋企。
見嘉玲咁風騷，原來呢排放緊大假，未有新工作。近日有傳媒指佢為箍住老公個心，不惜花錢去美國搵代母生仔，嘉玲聽見「代母」兩個字，不置可否，大笑三聲：「哈，哈，哈。」是真是假，大家自己揣測嘞。
卓妮