政情：高永文埋班角逐選委
下屆特首選委會選舉年底舉行，其中醫學界選委議席由上屆二十席增至三十席，據聞骨科名醫兼防癌會主席高永文會同六位城中名醫合組「七君子」名單。名單粒粒皆星，包括曾為前律政司司長梁愛詩治療腸癌、人稱「朱大腸」嘅外科專科醫生朱建華，同埋瑪嘉烈醫院兒科顧問醫生周鎮邦等。
蔡堅約范太食飯
擁有大量私家醫生票嘅醫學會，今年決定派出三十人出戰，並已去信兩大公院醫生組織，邀請合組名單。會長蔡堅話，已請到疑似特首候選人范徐麗泰食飯，之後會約見埋其他疑似候選人。而公立醫院方面，公共醫療醫生協會前會長何栢良透露，該會初步計劃派十人參選，相信現任領導層都走唔甩，而佢自己就仲考慮緊。
佢又話，佢哋會集中爭取改善醫生待遇，未必可以同醫學會夾得埋，似乎傾向各自派人拗手瓜。而由年輕醫生組成嘅前線醫生聯盟亦有六至七人有意出選，主席蕭旭亮話因為選特首始終係向全港市民負責，唔想下下都淨講業界利益，初步傾向以改革醫管局為聯合政綱喎。