政情：民主黨參選特首似兒戲
民主黨尋日召開會員大會，討論畀唔畀個黨派代表參加下年特首選舉，最終結果一如所料，以一百三十二比四十五大比數通過議案，即係話民主黨嚟緊可以派人出嚟爭櫈仔。主席何俊仁（鐵頭仁）尋日重申，泛民主派應該舉行初選，搵出參選特首選舉嘅代表。
是是但但隨時唔玩
鐵頭仁建議，成個泛民購買三百至五百部平板電腦，喺各主要港鐵站同人流多嘅地方做初選，市民只要輸入性別同身份證頭四個數字就搞掂；佢話，暫時唔估計其他泛民會唔會參與，但就認為用嘅錢唔多，泛民應該負擔得到。粗略估計，幾百部平板電腦要百幾萬蚊，唔係講玩，但白鴿黨話，電腦可以籌款買，借又得，用完賣晒出去都得。
不過講到底，其實成個所謂初選睇落認真是但，除咗其他泛民未表態之外。最離譜嘅係，初選會安排喺明年一月舉行，但如果民主派十二月選委會選舉贏唔夠議席，咁就唔玩㗎喇，咁仲唔係兒戲咩？