政情：黃家和帶隊歎金茶王
做嗰行唔一定會厭嗰行，好似香港咖啡紅茶協會主席黃家和咁，由細就喺茶餐廳打躉。尋日佢親自帶隊，同三十位來自美國、英國、澳洲、西班牙、加拿大、中國、台灣同香港嘅奶茶迷去飲奶茶，仲搵咗上年「金茶王」大賽冠軍羅德師傅傳授沖奶茶技巧。
今次嘅奶茶之旅可以話係嚟緊《國際金茶王大賽2011》嘅前奏活動，為咗呢個比賽，黃主席之前去咗世界各地多個華人地區舉行選拔賽，其中墨爾本一站，仲因為凍得滯，搞到佢返嚟氣管炎，要入院抖咗成個星期，尋日瘦咗成四公斤嘅佢，見團友飲得開心，辛苦啲都值。
講開值得，金茶王今年係第三屆，第一屆嘅冠軍係洪水橋嘅茶餐廳，由日賣五百到增至每日最少賣二千杯，仲試過沖茶畀重慶市委書記薄熙來飲添。
申請奶茶列文化遺產
黃家和話佢好希望將香港奶茶推動到全世界，依家申請緊將佢納入聯合國人類非物質文化遺產，佢仲希望有朝一日可以有機會喺人民大會堂舉行「金茶王」大賽，將香港嘅地道奶茶文化推廣開去。