政情：維園阿哥追撞白鴿新星
區議會選舉就快殺到埋身，大家都想睇吓各政黨會派邊個出嚟選區議會，繼而挑戰超級區議會議席。不過選區議會除咗想贏，想其他人輸都可以係其中一個目的，仲有一個目的，就係要提高知名度。工聯會票后陳婉嫻會出選嘅選區，就好大可能發生追撞事件：由「死過翻生」嘅維園阿哥任亮憲，追撞想藉挑戰嫻姐提高知名度嘅民主黨李耀基。
民主黨為咗提高第二梯隊知名度，喺嚟緊嘅區選，除咗黃碧雲去九龍城黃埔東挑戰梁美芬外，新星兼支聯會常委李耀基盛傳都會去黃大仙挑戰嫻姐，黨內消息話，佢喺明年極有機會接立法會議員李華明棒，出選立法會。而任亮憲則據聞已經磨拳擦掌，準備落去黃大仙搞一場三人混戰，真係好睇過戲。
三人混戰各有目的，嫻姐為咗贏，準備參選超級區議會，李耀基想提高知名度，而任亮憲，就係想李耀基輸，想搞搞震。咁搞法，即係令嫻姐贏得更輕鬆。任亮憲優於強辯，所以呢場選舉雖然明知嫻姐贏梗，喺選嘅過程中，相信都會火花四濺。
據講，任亮憲認為李耀基挑戰嫻姐，本身都唔會有地區工作支持，所以到時泛民選民考慮嘅就只會係政治立場、個人魅力同辯才，佢自信呢幾方面都唔會輸畀對方；而且，若然佢最終得票比李耀基高的話，咁唔單止可以令對方黯然無光，知名度不升反跌之餘，更有可能一沉不起，佢自己亦可以藉住追撞陳婉嫻，提高番自己同人民力量嘅人氣，此舉實在一舉兩得，對人民力量往後發展亦有好處。
話留待人民力量安排
正正因為咁，任亮憲如果真係出選的話，佢未必會集中火力攻擊李耀基，反而會諗吓點樣對付嫻姐，只要做得好好睇睇、表現比李耀基好的話，咁佢嘅目標就自然可以達成啦。我哋搵過任亮憲求證，佢就話一切留待人民力量安排，唔會回應傳聞喎。咁又係嘅，呢一刻所有嘢都言之尚早，始終嫻姐落邊區仲係神神秘秘，李耀基係唔係真係想單挑嫻姐又未知，作為選民嘅當然希望成事啦，始終有競爭先有進步嘛！