中環出更：李國棟念念不忘三頭鮑
自從日本洩漏輻射，鮑魚即時漲價，馬會大董李國棟醫生好捨得，將珍藏咗超過十年嘅三頭鮑魚捐出嚟做善事，由快勞夾大王杜振源投得。不過佢又對啲鮑魚念念不忘，講到明老友記煮鮑魚之日，一定要通知佢去食。
搵杜振源「黐」餐
李國棟醫生珍藏呢斤三頭鮑好耐，上次為小母牛慈善拍賣晚宴帶來過百萬善款，好有意義。卓妮早前喺香港會門口撞見李醫生，傾起三頭鮑，佢話，三頭鮑係現時世界上最大Size嘅鮑魚，日本大災難之後，起碼要再等多廿年先至再有得食，所以佢雖然慷慨捐出名貴鮑魚，但又心思思想知道杜振源幾時會煮嚟食，到時佢一定會去加雙筷咁話。杜振源已經講明，到時會搵鮑魚大王楊貫一去炮製，一定唔會暴殄天物。
最近溫州高鐵慘案震驚中外，李醫生嚟緊都要去內蒙同西安講學，同嗰邊嘅醫護交流家庭醫學學術，不過佢話到時會坐飛機，唔使搭高鐵。