中環出更：葉澍堃穿膠花搵銀買零食
穿膠花係六、七十年代貧苦大眾嘅救星。馬會大董葉澍堃（Stephen）都自爆童年穿膠花賺錢。古物諮詢委員會主席陳智思（Bernard）家境富裕，穿膠花無佢份，童年最開心係踢完波後飲綠寶汽水。
馬會尋日喺石峽尾賽馬會創意藝術中心舉行「港文化‧港創意」展覽，將反映香港草根實況嘅深水埗傳統文化重現眼前。Stephen同Bernard都嚟湊熱鬧。
咪睇Stephen官仔骨骨，原來佢七十年代喺深水埗做過五年民政事務專員，絕對係「地膽」，佢話，當年南昌街有間酒家叫做凱旋樓，點心抵食夾大件，可惜酒樓已經執笠。
陳智思愛踢波飲「綠寶」
會場展出多件懷舊日用品，包括紅A公事篋、膠櫈、舊汽水樽等，仲有人即場示範穿膠花、車布袋。Stephen捲起衫袖試穿，邊穿邊話當年，自爆當年穿膠花幾好搵，夠錢買零食。尋日再次重拾膠花，技巧依然無生疏。
Bernard執起膠花研究，顯得好奇，即場試穿一朵送畀太太。Bernard又自爆同石峽尾有淵源，童年時愛約三五知己嚟呢度踢波，出完一身汗歎支綠寶汽水，認真爽。
Stephen太太Nancy都畀懷舊展品吸引，見到會場有紙皮製嘅舊式月餅盒，好雀躍。現場有個「土炮市場」，售賣創意物品，Nancy睇中一條皮頸鏈，花六十元買來心頭好。
卓妮