港府從來都係該做唔做，唔該做亂做，次次都要爆大鑊至知衰。好似強積金咁，不倫不類，唔湯唔水，當局唔對症下藥，反而藥石亂投，卒之又畀人狂插。
呢，積金局唔知抽咗邊條筋，建議設立恩恤制度，容許供款人喺患有危疾、置業及升學等特殊情況下，可以喺退休前提取部分強積金應急。點知呢條屎橋一出就劣評如潮，港大社工及社會行政學系講座教授周永新狠批建議「低Ｂ到痹」，絕對不合時宜，係未學行先學走，根本行唔通，咁嘅諮詢完全係浪費時間。
何解學者咁扯火？係人都知，強積金供款率低，成立時間短，滾存金額多極有限，家陣每個強積金戶口平均只得十幾萬蚊咁大把，唔好話置業，就算大學生攞嚟交學費都未必夠啦，你話係咪盞搞吖！
當局聲稱有關建議係參考新加坡嘅制度喎。不過周教授就篤爆，人哋新加坡係超強強積金，而香港嘅就「低Ｂ到痹」，點樣參考吖。唉，又難怪教授咁勞氣，唔怕唔識貨，最怕貨比貨，新加坡上世紀五十年代已經設立強積金，比香港早幾十年，而且供款率又高，款項由政府統一管理，唔只免稅，仲設定保證回報率，唔夠由政府包底。
而講到香港強積金咯喎，就認真羞家，管理費貴、風險高、回報低，幾乎賺埋都未夠畀基金經理，推出十年畀市民鬧足十年。基層打工仔辛辛苦苦供款，退休後得番雞碎咁多，買糖唔甜，買鹽唔鹹，試問點安度晚年吖！
正如周教授話齋，當局應該先做好長期服務金、遣散費對沖同管理費過高嘅檢討，而唔係「再搞咁多嘢」。亦有立法會議員話，應該先討論強積金自由行、半自由行問題，恩恤制度十幾年後至考慮都未遲。
功夫茶諗極都唔明，學者同議員嘅建議並唔係乜嘢高深嘅經濟理論，普通人一聽就明，強積金嘅設計同管理出咗問題，點解當局唔撥亂反正，偏要阿茂整餅，冇嗰樣整嗰樣。所謂恩恤制度，話就話江湖救急，其實係飲鴆止渴。
話時話，強積金不倫不類，好多打工仔退休後只能夠望天打卦，隨時臨老唔過得世，當局一味小修小補，根本係嘥時間，不如索性將強積金摺埋，及早推行全民退休保障仲好過喇。
咪話功夫茶唔提醒，年初財爺鬍鬚曾推出「史上最廢預算案」搞到民怨四起，跪低收場，都係因為「注資強積金」惹出禍嘅咋，如果當局今次又唔識死，遲早衰多一鑊！