政情：梁栢賢好忍功捱得鬧

尋日佢出席半島青年商會舉辦嘅「點解領袖係領袖」座談會時，就自爆做過一個外籍醫生嘅下屬，對方經常用啲唔鹹唔淡嘅廣東話嚟鬧佢，好似話「生舊叉燒好過生你」，有次仲唔客氣到鬧佢「你食屎屙飯」。

梁栢賢話，好在佢EQ高，一啲都無嬲，仲反問上司呢個係咪公共衞生嘅最高境界，將廢物變為有用呢？從此佢上司唔敢再鬧佢，咁好脾氣，難怪佢喺壓力咁大嘅醫管局工作都捱得住喇。對於近期炒得熱烘烘嘅特首選舉，大家會期待未來特首應該望遠啲定睇近啲呢？梁栢賢舉例話，佢喺三藩巿揸車去紐約，咁遠路好難睇得好長遠，所以只係會留意前面二百米有無撞親人。

不過，出席座談會嘅菁英會主席洪為民就話，佢一定要確定無行錯路，否則去咗墨西哥就唔知點算，所以佢好着眼政策係咪長遠配合香港嘅需要，佢又話依家香港個大勢環境已經同以前好唔同，唔單只係拚搏就得，仲要有其他配合喎。