政情：胡官有口難言替補制
身兼截取通訊及監察事務專員嘅胡國興法官，尋日主持警察學院結業典禮時，自稱同警隊有不解緣，佢記得以前做大律師時經常同警察作對，搞到班警察好憎佢，但之後做咗法官就要平衡警察同被告嘅證供，於是變得中立。
不過，佢話依家做咗截取通訊及監察事務專員後，就係「兩者混合」，要抗衡警察，避免佢哋濫權，同時又要保障市民嘅私隱。
胡官尋日被問到點睇防止泛民主派議員搞變相「公投」嘅替補機制，佢聽到問題後即刻諗一諗，然後話：「做法官唔講，牽涉到政治，唔講喇！」
佢仲講到明話自己個人對替補機制係有意見嘅，但唔想捲入政治漩渦，費事對本港司法同市民有唔好嘅影響啦！不過，胡官就寄語一班畢業警察，話治安同自由係相輔相成嘅：「治安唔好，有自由都無用」。