政情：九把刀最愛《海賊王》
好多人都鍾意寫作，出書做作家更加係夢想，但作家之路唔係個個行得順。台灣網絡文學作家九把刀就喺書展中講述自己有血有淚嘅寫作奮鬥史。九把刀話自己好熱愛追求夢想，最鍾意漫畫《海賊王》男主角成日大嗌「我要成為海賊王」，後來佢睇手塚治虫嘅作品得到啟發，令喜愛繪畫嘅佢立志要成為漫畫家。
起初九把刀都得到爸爸嘅支持，但佢老師就唔係咁諗，搞到佢爸爸都轉軚，仲叫佢好似手塚治虫咁，做咗醫生先再做漫畫家，令佢好氣餒。後來九把刀睇咗《敦記畫廊》，發現自己欠缺漫畫家嘅才能，亦領悟用文字講故事簡單得多，於是佢運用漫畫分鏡嘅原理寫小說，仲運用電影嘅節奏寫小說。
不過，九把刀後來發現自己部分作品被延遲推出，但佢都好樂觀咁諗︰「奇迹只會降臨在不言放棄的傢伙頭上，絕不可小看奇迹。」
九把刀又提到，有一年佢媽媽得了血癌同肺結核，令佢好憂傷，於是開始寫佢同媽媽之間嘅事，仲每月創作一本書，連續寫咗十四個月，認真唔簡單。