政情：廢區會委任未計掂數
夕陽政府面對嘅政治炸彈多不勝數，經常喺唔適當嘅時間推出唔適當嘅政策，等於自掘墳墓，好似替補機制風波一波未平，嚟緊又要面對取消區議會委任制呢個戰場。取消區議會委任制細節嘅公布時間一拖再拖，據聞要拖到十一月區議會選舉前夕先至公布，明眼人一睇就知同政治利益有關，當局至今未能準備評估區選形勢，即係未計得掂建制派喺十八區可以贏到幾多個議席。
二○一二年政改方案喺去年六月底獲得通過，政制及內地事務局局長林瑞麟（林D9）曾揚言，會就取消區議會委任制向立法會提交建議，之後又改口承諾會喺本年中提建議，但一直未有下文。最近傳出新講法，就係會喺十一月區選前公布，五時花六時變，分分鐘唔多覺拖到區選後至公布，配合建制派控制十八區區議會，咪以為好出奇，事關呢個夕陽政府乜都做得出。
除咗公布時間一改再改，政府亦未能擺平泛民主派同建制派對委任議席減幅嘅角力。眾所周知，泛民主張政府一次過取消區議會委任制，有議員仲形容呢個根本係「政治僭建」，佢哋對委任制有幾咁怨恨可見一斑，但身為既得利益者嘅建制派當然唔係咁諗，喺分兩階段或三階段取消委任制嘅問題上，當然傾向愈遲全面取消愈好，以維持區議會嘅主導權，為政府政策保駕護航。
傳施政報告後公布細節
面對泛民與建制派擺明車馬「叫價」，夾喺中間嘅夕陽政府只可以採取拖字訣，評估建制派喺嚟緊區選嘅勝算之餘，仲要安撫夠鐘「起身」嘅委任區議員，其中深水埗區議會主席陳東及東區區議會主席丁毓珠就喺今年獲頒金紫荊星章。據悉，政府最終會選擇喺十月發表施政報告後公布取消區議會委任制細節，可一併評估市民對施政報告嘅不滿程度，以微調減少委任議員嘅數目。
正如上屆區選一樣，部分夠鐘「起身」嘅委任區議員已早有盤算，想繼續做區議員嘅已搵定後路參加直選，好似深水埗委任議員陳鏡秋，已計劃出戰李鄭屋選區，據講仲有幾個議員會轉直選，唔使等政府派發「免費午餐」。