中環出更：留台大學校友聯會 慶銀禧
台港關係愈來愈緊密，連三萬幾名曾經喺台灣留學嘅香港人，都感受特別深刻。香港留台大學校友聯會早前喺尖沙咀一間酒樓大排筵席，歡度廿五周年銀禧會慶。咁啱台北經濟文化辦事處日前正式運作，一眾留台校友包括南太集團主席顧明均、恒星電子董事長蘇洪根、九龍總商會永遠會長黃熾雄等人現身撐場，提到台港關係進入新里程碑，大家開心過中獎！
徐世樑憶艱難歲月
聯會主席徐世樑話，當年香港只得港大一間大學，中學畢業生升讀大學好艱難，惟有去歐美或台灣升學。不過，去歐美坐船都要三星期，就算有錢都未必去得咁遠，所以好多人都選擇過台灣，而佢嘅中學同學就有一半去咗台灣讀書，諗起嗰段艱難嘅歲月，感慨良多。卓妮同顧明均傾開，先至知道原來佢係台灣大學法律系畢業生。
同樣係留台學生、知名馬主蘇洪根當晚忙到唔得閒坐低，佢事業有成兼且幽默風趣，人緣好到不得了。當晚台北經濟文化辦事處處長楊家駿、前中文大學校長金耀基、台北貿易中心總經理劉錫威等人都喺度。與台灣關係密切嘅珠海大學校監江可伯、校長張忠柟亦齊現身。過百人齊齊舉杯暢飲，講起當年趣事，好似重返年少輕狂歲月，不知幾開心。