中環出更：項明生穿墨國服分享遊歷
尋日適逢周六假期，書展人氣極之旺場，唔少講座都逼到水洩不通。同時係旅遊作家嘅Sony Computer Entertainment香港市場部總經理項明生（James），喺一眾老友撐場下，同粉絲分享旅遊見聞。著名核能專家、城市大學校長郭位就同大家講日本輻射嘅危與機，吸引逾二百名關心環保同健康嘅市民，連內地遊客都趁機入場聆聽，真係夠晒威水。
一向鍾意扮鬼扮馬嘅James，尋日着住佢早前喺墨西哥旅遊時買嘅民族服裝「Poncho」，帶領讀者進入佢嘅墨西哥、古巴十日神奇之旅，聽到大家入晒神。James話，件衫冬暖夏涼，售價只係一百六十元，佢一見到就愛不釋手，旅遊期間經常着住，難怪佢喺旅途中咁受歡迎。
郭位：港輻射與仙台睇齊
卓妮轉頭又去捧郭位校長嘅座談會，未開場已經滿座，唔少人為咗聽佢解讀福島核事故，企足個半鐘都唔介意。郭校長透露，原來佢喺日本大地震發生一個月後秘密訪日，而且仲係去距離福島核電廠只有百幾公里、位於仙台市嘅東北大學訪問添，當時日本核輻射危機仲未明朗，對郭校長嚟講，真係學術交流大過天。
郭校長又話，雖然輻射可怕，但其實港人日日暴露喺0.3微希嘅輻射量之下，同災區仙台輻射量睇齊，所以大家唔使太過杞人憂天喎。
卓妮