政情：黃家和「入廠」呻要戒口

我哋尋日致電黃家和，佢話事緣幾個星期前去過澳洲公幹，宣傳喺當地舉辦嘅金茶王大賽，由於當地氣溫只有四至五度，同香港嘅溫差好大，加上又帶唔夠衫，可能一冷一熱之下搞到病咗喎。

黃家和仲話，佢嘅氣管一向唔多好，其實平時已經好小心，今次病倒後，醫生仲特別叮囑佢，未來兩星期都唔可以周圍去，本來原定計劃同旅遊發展局去日本仙台考察，但依家都被迫取消行程，認真慘情。

不過，佢話咁都未算慘，最慘係要戒口，一切生冷同刺激嘅食物都唔可以食，就連最愛嘅紅酒都唔飲得呀，真係淒涼。