政情：阿Paul棄旅界勢掀混戰
旅遊界一直係自由黨嘅橋頭堡，但上屆「法律超人」謝偉俊（阿Paul）成功拉攏中小旅行社票源突襲成功，自此不時發表辛辣嘅言論，屢次擊中夕陽政府嘅施政盲點，政界中人都對佢刮目相看。據聞阿Paul最近仲畀人游說轉戰九龍東直選，雖然阿Paul至今仲係十五十六未有最後決定，但已經觸及各路人馬對旅遊界議席虎視眈眈，屆時勢必爆發一場大混戰。
有消息透露，各界都金睛火眼留意阿Paul會否轉戰直選，一方面自由黨希望派出前旅議會主席何栢霆「光復」旅遊界，與經濟動力關係密切嘅旅議會主席胡兆英亦蠢蠢欲動一試，曾在○七年高票當選旅遊界選委嘅太古旅遊董事總經理梁志群亦盛傳有意加入戰團，加上選舉常客金怡假期葉慶寧同公民黨司馬文，相信到時旅遊界個議席一定爭崩頭。
除咗旅遊界，其他功能組別亦七國咁亂。有消息話，開會「三點不露」嘅金融界李國寶，雖然有意不再參選，但佢打算將議席傳畀同屬東亞銀行嘅顧問陳子政做一屆，之後先隔代傳畀佢個仔接棒。年屆七十二歲嘅中總黃宜弘，盛傳佢以自己精力好好為由想唔退，而同樣年過七十嘅何鍾泰亦以自己實力強橫為由想留低，究竟佢哋嘅如意算盤打唔打得響就有待時間驗證喇！