叫得做購物天堂，梗係百業興旺，消費者有讚冇彈至啱數。可惜，香港呢個購物天堂居然遍布消費陷阱，無論係健身、收費電視服務、購買教科書定係美容扮靚，稍一不慎，都有可能中招，問你驚未！
消委會舊年接獲有關健身中心嘅投訴八百六十宗，比前年多咗近七成。部分個案超離譜，無良業者連精神病患者都唔放過；亦有事主喺健身中心職員輪流游說下，被扣押身份證同信用卡，然後被迫簽落幾十萬蚊合約，簡直同打劫冇乜分別。
纖體健身消費陷阱多多，而使用收費電視服務一樣隨時中招。舊年消委會共接獲一千八百四十幾宗投訴個案，今年數字更驚人，頭五個月涉及更改或終止合約嘅投訴個案比舊年同期多咗近九成。
講到教科書，更係例牌食水深。當局將教科書同教材分拆得個噏字，小學同中學書價平均加幅唔止高過消費物價指數，仲係過去兩年最高。至於美容扮靚咯喎，消委會檢驗過市面三十款唔同價錢嘅面膜，超過一半驗出含可致敏防腐劑，長期使用仲可能會引起皮膚炎添。
消費陷阱「梗有一個喺左近」，不良商家偷呃拐騙，手法層出不窮，本港對消費者嘅保障好明顯遠遠唔夠，當局再懶懶閒乜都唔做，購物天堂嘅金漆招牌遲早冧得。
係人都知，旅遊係本港經濟支柱之一，最弊遊客消費佔本地零售市場比重愈來愈高，投訴數字亦同步上升。消委會過去半年收到訪港遊客嘅投訴增加咗兩成五，其中內地遊客投訴勁升三成，個人遊投訴更加暴增六成半，問題嚴重程度可想而知。
幾年前，央視透過放蛇調查，踢爆本港黑店貨不對辦、以次充好、價格欺詐，港府賊過興兵打擊咗一輪，之後就不了了之。野火燒不盡，黑店吹又生，內地客投訴不減反增，證明當局嘅所謂打擊，有姿勢冇實際。
講開又講，前排接二連三有連鎖瑜伽中心結業，社會上要求加強監管呼聲愈來愈大，當局迫於壓力，建議對部分消費服務強制設立冷靜期。條例已經完成諮詢，本來計劃今個立法年度提交審議，點知依家仍未有聲氣，究竟仲要拖到幾時呢？
保障消費者權益，關乎本港購物天堂聲譽，如果當局仲唔做好呢份工，搞到連內地客都唔上門，香港仲可以靠乜嘢生存呢？