政情：應家柏返鄉度橋搏殺

原來馬會亦做唔少市場調查，即係搵人喺口岸搵港人賭仔做訪問，例如問吓受訪者幾耐過一次大海，仲有平均輸幾多錢咁，當然仲有搵人打聽外圍莊家有冇新招啦。講起外圍招數，應家柏爆料話，啲莊家隨時可以向賭客提供百分之十五至二十大額折扣，近年更有莊家出動直升機送貴賓過澳門，都咪話唔巴閉！

不過應家柏都慨嘆，睇番香港依家嘅政治環境，要改革博彩政策甚難，惟有先諗吓點樣提升馬會服務留住客源。忙足一年，馬季剛煞科，應家柏話計劃返歐洲探父親，充完電再搏過。