政情：張國柱騎呢比喻諷煲呔曾
電影《變形金剛》同全民退休保障有乜關係，但社福界張國柱尋日喺立法會答問大會，再次追問煲呔曾會否推行全民退保時，就攞出兩張由《變形金剛》電影海報改成嘅煲呔曾漫畫，問對方想做忠嘅「博派金剛」定係奸嘅「狂派金剛」，大意係問政府想做好人定壞人，聽落有啲騎呢。
一直自稱好支持創意產業嘅煲呔曾，好明顯未睇過套戲，表現得一頭霧水，但又唔敢開口問清楚，非常尷尬。此外，之前漏報高鐵撥款潛在利益嘅專業會議議員石禮謙，尋日喺會上提議將西鐵上蓋地皮改建公屋，但佢又唔記得申報自己係港鐵董事，連忙補做申報，完全冇吸取高鐵事件嘅教訓。