政情：告別立會大樓點點滴滴

李華明：唐唐假勤力

「肥仔明」李華明爆料，話政務司司長唐英年（唐唐）當年做立法局議員時，坐喺佢隔籬，初初以為唐唐好勤力猛咁刨文件，但後來揭發唐唐睇嘅唔係議會文件，竟然係法國波爾多紅酒價錢單張。

黃國健：女神冇眼睇

立法會大樓頂豎立嘅泰美斯女神像，蒙住雙眼係寓意唔會被眼前事物蒙蔽。工聯會黃國健就有另一番睇法，佢話可能係女神唔想睇到立法會內粗口橫飛，唔想見到議員「泥漿摔角」，將來立法會變回法院後，就可以開眼見人喇！

涂謹申：抱得美人歸

白鴿黨議員涂謹申喺立法會已有二十年光陰，眼見身邊官員由二十年前小官，升至位高權重，但自己仲係一個議員。雖然政場未得志，但幸好識到現時個好老婆，仲喺立法會大樓影埋結婚相，嚟緊又榮升爸爸，係個完美終結。

張文光：夜半遇女鬼

教育界張文光笑笑口話，自己經常做到三更半夜，有次試過喺三樓工作房外遊走，當時四周漆黑一片，只餘下電腦螢幕閃爍嘅光源，呢個時候就見到有個着住和服嘅女仔走過，場面相當驚嚇，謎團至今仍未解開。

詹培忠：入獄為休息

金融服務界詹培忠就話自己最犀利，因為佢係首位以議員身份入獄，前無古人後無來者。不過，佢死口唔認係坐監，只係話自己當年入去赤柱監獄係好好「休息」啫，休息個幾月後重出江湖，之後仲重返立法會。

李鳳英：跌傷嘗溫情

○九年喺立法會樓梯跌鑊甘嘅勞聯李鳳英，回憶當年慘況時，佢話自己跌完後要做大手術，好長時間都唔可以返立法會開工。身心受創嘅英姐，最後得到班議員同秘書處職員日日探望，令佢非常感動，壞事變為開心事。