中環出更：葉澍堃李國棟講減肥互窒
減肥唔係女人專利，為咗身體健康，男人都一樣關心自己身體質量指數（BMI）。好似馬會大董葉澍堃（Stephen），最近都加入減肥行列，目標要減十磅至一百五十五磅，為咗達標，即使對住幾十萬元嘅名酒都可以不沾唇，咁忍得，皆因佢嘅家庭醫生、馬會大董李國棟嘅忠告。
「叫我減肥 佢仲重啦」
Stephen早前同李國棟一齊出席小母牛慈善晚宴，講起減肥，原來李醫生要佢減十磅，BMI就會fit啲。不過，減肥最辛苦就係戒口，尤其是美酒佳餚當前都要當睇唔到，要保持長期節制能力，唔係人人捱得住，難怪Stephen笑笑口對住唔使忍口嘅李醫生話︰「叫我減肥，佢仲重過我啦！」
不過叫慣人減肥嘅李醫生就四両撥千斤話︰「葉生一向fit開要繼續keep住，我不嬲都唔fit所以唔使減。」其實Stephen嚟緊都會自然瘦，事關佢要去貴州探農民，之後又要陪老婆去東歐旅行，行程咁緊湊，又冇老婆靚餸同湯水，多多少少都會減到磅嘅！