中環出更：許學之派扇賀潮人
俗稱「鬼節」嘅中國傳統盂蘭節，已跳出宗教層面，成為香港人的集體回憶，潮州人舉辦嘅「盂蘭勝會」，月前更成功被列入國家級非物質文化遺產。有份「申遺」嘅潮屬社團總會主席許學之開心過嫁女，出紀念特刊廣泛宣傳外，又印製絹扇派街坊。
盂蘭勝會成功申遺
盂蘭勝會喺香港有逾百年歷史，每年農曆七月，分布全港六十多個社區嘅潮人組織，都會架起大型臨時醮棚，上演家喻戶曉嘅「神功戲」，深受歡迎。不過，許主席慨嘆，現今年輕一代忽略「盂蘭勝會」，以為係迷信風俗，但其實當中宣揚派米扶貧，及祭祀先人嘅孝道傳統，係不可多得嘅香港精神。
許主席又憶述，童年時喺家鄉過盂蘭節，遇上日軍侵華，處處饑荒、霍亂，街坊無錢醫病，惟有向蒼天祈福，呢一幕，至今仍深深印喺佢腦海內。趁住今次申遺成功，潮屬社團大舉慶祝，找來國學大師詳述盂蘭勝會深藏嘅含義，仲趕製二萬把絹扇，派畀城中「潮人」。
原來派扇係有原因嘅，許主席話，炎夏睇神功戲，熱到汗流浹背，有扇在手撥一撥，正好舒解悶熱！本月底將踏入農曆七月，又到一年一度嘅盂蘭節月份，大家不妨去參加吓盂蘭勝會，感受吓呢個國家級非物質文化遺產。
卓妮