立法會議員職責之一係監察政府，假如議員不孚眾望，會造成乜嘢後果呢？即係咁，如果有一條大懶蟲喝令另一條大懶蟲勤力工作，唔係話唔得，說服力等於零咁解囉。
呢嗱嗱嗱，大家都知特區政府有幾懶o架啦，十大基建未見影，優勢產業得啖笑，「邊緣化」三個字成為集體噩夢。照道理講，議員應該當頭棒喝，可惜實際情況係海軍遇着水兵，原來議員都係懶到出汁，開會出席率之低簡直慘不忍睹。
立法會今日舉行本年度最後一次大會，本報翻查秘書處紀錄，揭發一條又一條議事堂大懶蟲，包括體育界霍震霆、金融界李國寶、鄉議局劉皇發、中總黃宜弘以及醫學界梁家騮等等。好似三十五次例會以及特首答問大會咁吖，全體六十名議員以霍震霆出席率最低，只有六成三，其次係劉皇發、黃宜弘以及代表工總嘅經濟動力梁君彥。大家必須注意一點，有出席唔代表冇遲到早退，事關「三點不露」或者「報到即閃」已經係習以為常嘅壞習慣。
至於個別議員喺其他小組會議嘅出席率更加係接近隱形。以工務小組委員會為例，劉皇發只有百分之八出席率，其次係霍震霆同梁家騮，分別只有一成半同三成一。
講咗咁耐，係時候睇睇尊貴議員嘅民望。港大民意研究計劃發現，市民對於議員整體表現嘅滿意度，下跌至只得一成，較三個月前下降三個百分點；表示不滿嘅就高達五成一，民望淨值係負百分之四十一，創出九八年調查以來新低。
喂喂喂，成日話曾蔭權班子民望插水，唔係衰呢樣就係衰嗰樣，之但係插極都未見插到只有一成滿意度喎，因乜事幹議員民望仲差過廢柴俱樂部嘅一眾成員？莫非六十個議員成立咗一個等而下之嘅傻瓜同鄉會？一成民望呢家嘢，同衰到貼地已經冇乜分別，功夫茶唔反對你用高登神獸「金翅仆街鳥」作為議員吉祥物。
好嘞，政府民望已經低，議員民望更加低，請問如何有效監察政府？舉一個例吖，素有「鼠王芬」之稱嘅梁美芬本來係替補機制嘅始作俑者，後來不但怯於民意而轉軚，而且發表「懲罰選民論」，仲要抽水邀功發傳單表揚自己成功爭取押後表決，呢一位議員嘅民望毫無疑問經已貼地，日後何德何能再去監察替補機制嘅立法工作呢？
計功夫茶話齋，知恥近乎勇，唔該尊貴議員好好改善，否則煩請退位讓賢，趁辭職之後仲有補選而唔係替補吖嘛！