夕陽政府收尾兩年Hea住做，好似派發六千元安排搞到七國咁亂，尤其係唔採用直接過戶方法而要市民去登記，不但折騰長者去銀行排隊，大家最驚就係引起混亂出意外。尋日有市民就致公開信點醒煲呔曾，話如果政府一意孤行要捨易取難去派錢，就要做足安全準備，否則有乜傷亡，就會遺臭萬年，佢仲提出九招「派錢災難應變措施」，以減低傷亡數字。
我哋總結咗呢位市民嘅九招派錢措施，包括派錢當日要安排義工守住人流密集嘅扶手電梯，隨時協助長者及疏導人群，避免發生扶手電梯意外。由於個別舊區長者排隊人數較多，銀行方面應該盡量安排佢哋坐喺有遮蔭嘅地方等候，冷氣都要較細啲，避免長者又熱又凍暈倒。佢仲提議應該臨時增加急症室人手，骨科、心臟科及腦科醫生等都要取消休假，如果遇到急需要錢、情緒激動嘅長者，都應該盡量安排有關長者同社工見面，警方應避免使用武力喎！
呢位市民總結時語帶警告話，呢個史無前例嘅派錢創舉將記載喺香港歷史文獻上，包括傷亡數字，最終名留青史定遺臭萬年只係一念之差，話祝煲呔曾好運喎！