政情：譚香文發「e貓」撲水
前立法會議員譚香文（Mandy）由○三、○四年喺不被看好之下，乘住七一效應先後爆冷當選黃大仙區議員及會計界立法會議員，喺○五年政改一役，更被吹捧成「民主女神」，但其後○七及○八年卻先後輸掉區議會及立法會議席，黯然退出公民黨，甚至被控透過搞講座拉票賄選。最近佢疑似山窮水盡，向朋友廣發電郵公開撲水，認真坎坷。
尋日有人收到一封署名Mandy嘅電郵，話佢本來用作服務社區嘅資源，都已投入有關賄選嘅訴訟，因此要向支持者尋求捐助搞社區服務，並隨郵附上由佢創立嘅鑽石山居民協會銀行戶口號碼。政界人士搞晚宴或者喺街頭籌款就見得多，求其發個電郵就想人捐錢就好少見，仲要連戶口號碼都公開埋，收件人就懷疑Mandy係咪又畀人惡搞。
我哋搵過Mandy查證，原來封電郵真係佢發出嘅。佢否認山窮水盡，但承認要同時應付官司及地區工作好辛苦，希望各方好友幫幫忙。對於有傳工聯會前立法會議員陳婉嫻會空降Mandy嗰選區，搵佢祭旗再參選超級區議會，Mandy話至今都未見過嫻姐落區，就算係都未驚過喎！