政情：平叔促雙「英」辭公職
距離特首選舉只有大半年，多名疑似候選人已經彈出，更不時隔空互窒，好似其中行政會議召集人梁振英（CY）及政務司司長唐英年（唐唐），尋日又隔空放飛劍。外號「庸官殺手」嘅前高官王永平就睇唔過眼，不點名呼籲CY同唐唐，如果係有承擔、有心服務市民嘅，想參選就應該辭去公職，攞埋份政綱畀市民質詢，總好過依家不時互相單單打打。
話口未完，CY唔單止否認自己辭去行會召集人一職，仲喺論壇上侃侃而談，話若然政府有預視能力，早兩、三年就搞掂貧窮同房屋問題，唔使搞到依家咁多矛盾，擺明暗寸做過扶貧委員會主席嘅唐唐。至於唐唐尋日去會計師公會講十二．五規劃時，唔知有心定無意，話自己同上海市市長韓正關係唔錯，自誇有份促成香港直航去虹橋機場，好似想話畀CY聽佢好有背景咁。
羅太寸政府衰到貼地
除咗平叔之後，前高官羅范椒芬尋日都講得好精警，佢話問責制行得好唔好真係冷暖自知，事關啲局長成日要做炮灰，推銷自己未必想推嘅政策，士氣自然唔好得去邊喎。至於下屆政府會否好啲？羅太坦言，依家政府都衰到貼地咯，梗係否極泰來啦！羅太嘅說話真係一矢中的。