政府喺社交網站facebook上搞官民對話已經好幾次，但鋪鋪都係叫副局長出嚟頂，尋晚終於派個「次貨局長」、櫈都未坐暖嘅商務及經濟發展局局長蘇錦樑（Greg蘇）出嚟獻醜講競爭法。尋晚場對話全程只得四十五分鐘，但Greg蘇經常帶網民「遊花園」，答答吓又唔記得人問乜，靜咗成十幾秒，要主持提水先至過到骨。
政府呢個「時事Q&A」話就話叫對話，但全程由主持讀出問題，網民想問啲尖銳問題都唔得，莫講話同Greg蘇有關嘅卡片風波及國籍等問題，就連回答競爭法嘅提問都交行貨兼無料到。有網民問佢油公司夾埋一齊加價或減價，算唔算合謀定價，佢就耍太極話好難作個別評論，最後更拋個波畀競爭事務委員會，話由該會判斷先可以作準喎。
由於Greg蘇交行貨，所以環節後半部都唔係太多網民發問，到最後嗰十分鐘，只係佢同主持人喺度吹水。
最後主持叫Greg蘇總結時，佢仲夠膽話現時立法進度良好，似乎佢對立法會及外界嘅反對聲音，係完全聽唔到囉！