政情：唐唐條條Fing愛將心淡
原任香港總商會總裁嘅方志偉上星期突然辭職，各方關注邊個會接任呢個空缺。可靠消息稱，曾任職運輸及房屋局副秘書長嘅袁莎妮（Shirley）將會出任做總裁。係人都知，Shirley係政務司司長唐英年嘅愛將，Shirley舊年離開政府，佢幫唐唐參選特首嘅講法甚囂塵上。不過十個月過去，條條Fing嘅唐唐仍然冇聲冇氣，就算Shirley同佢劃清界線，疊埋心水搵份好工，都可以講係完全唔出奇。
傳為舊老闆辭官
Shirley九一年加入政府，作為牛津大學一級榮譽畢業嘅高材生，喺政府入面可以話係「超班馬」。周德熙任職工商局局長嘅時候，Shirley已經係工商局嘅首席助理局長。後來唐唐○三年加入政府出任工商及科技局局長，Shirley係佢政務助理，可以話係唐唐喺政府嘅盲公竹。之後唐唐出任財政司司長，都帶埋Shirley過檔，繼續做佢嘅政務助理，為佢出謀獻策，所以話Shirley係唐唐愛將嘅講法不脛而走。直至後來唐唐唔做財爺，Shirley先繼續自己嘅仕途，調任運輸及房屋局副秘書長，至舊年十月離開政府時，月薪達十四萬元，可謂前途無限。
Shirley原本係官場嘅明日之星，離開政府可以話都幾突然。不過大家都想當然，認為佢辭職都係為咗幫舊老闆唐唐喺特首選舉中助選，所以佢辭職後嘅大半年，都冇乜新動向。之不過近日全國人大常委范徐麗泰同行政會議召集人梁振英呢兩位疑似特首候選人愈嚟愈積極表態，反之唐唐就粒聲唔出，喺呢個咁微妙嘅時候，Shirley另有着落。做總商會總裁對Shirley嚟講係新挑戰，但以佢嘅能力又綽綽有餘，當然係明智嘅決定，反觀唐唐條條Fing，等佢都無謂。
講番方志偉，我哋早前提過，方志偉辭職，提早同總商會解約，其實同總商會嘅領導層不咬弦。早前喺總商會一百五十周年慶祝活動上，着住全套船長制服嘅方志偉安排理事們上台謝幕，好明顯佢自己扮演舵手一角，佢嘅舉動令全場驚訝，因為佢竟然當真正掌舵人即係總商會主席胡定旭冇到，所以話，方志偉被提早叮走，都唔係冇原因嘅。