中環出更：盧金榮開Ｐ 賀大女生日
菁英會副主席盧金榮（Wingco）平時公私兩忙，但係無論幾忙都好，屋企兩個寶貝公主永遠擺喺第一位。上周六佢個大女Ginnie五歲生日，壽星女第一次要求搵埋同學仔一齊慶祝，廿四孝爸爸Wingco就喺南區深灣遊艇俱樂部幫囡囡搞咗個盛大嘅開心生日派對。
盧文端送砌圖貼紙
當日盧家上下齊齊現身，壽星女嘅爺爺全國政協委員盧文端、姑丈中華廠商聯合會副會長吳永嘉（Jimmy）同太太盧金治都抽空到賀，可見呢位大公主有幾得寵。Wingco話，上周六唔係囡囡正日生日，只不過趁周末假期方便邀請同學仔一齊玩，遲啲屋企人會再食餐飯慶祝。
當日嚟咗廿幾三十位小朋友，壽星女就柯打咗至愛嘅Pizza、薯條請同學仔食，又玩扭公仔遊戲，不知幾開心。爺爺盧文端送咗Ginnie最鍾意嘅砌圖及貼紙畀孫女，姑丈Jimmy太忙冇時間揀禮物，一於送封大利是，至於爸爸Wingco就送贈益智圖書，佢梗係希望囡囡讀多啲書啦！
卓妮