中環出更：九巴金公主愛上花式滑冰
戀愛中嘅女人，特別勇敢大膽。九巴金公主伍穎梅（Winnie）近年竟然愛上花式滑冰，擺明向難度挑戰，原來啟蒙老師正係佢嘅九歲大姪女Nathalie。今年暑假，Winnie索性飛去美國探姪女，順便搵名師進修滑冰技術。
受冠軍姪女啟蒙
卓妮早前出席工業總會換屆午宴時遇到Winnie，佢話暑假會撇低富豪男友許晉平，去美國陪姪女、姪仔學滑冰。原來Winnie姪女來頭唔嘢少，係滑冰選手，曾代表香港參加喺泰國舉行嘅「亞洲青少年花樣滑冰賽」奪冠，仲上埋雜誌封面添！
睇見姪女飛馳冰上，十足仙女下凡，Winnie都為之心動，靜雞雞拜師學滑冰一年，轉圈等難度動作，佢都掌握到。男友不時睇佢練習，但就唔敢滑埋一份。學滑冰仲有另一意外收穫，就係減壓。Winnie話，當聽住輕快音樂喺冰場上翩翩起舞，心情寧舍Happy。咁講法，將來結婚，搞番個冰上世紀婚禮都唔錯喎！
話時話，Winnie依家嘅公職多籮籮，除咗係體育學院董事局成員外，仲係數碼港、平機會、醫管局、僱員再培訓局等成員，而且仲係智經研究中心理事添，咁忙仲抽到時間學滑冰，真係唔簡單。
卓妮