授勳明益自己友　關起門來一家親

港府今年「七一」嘅授勳名單，總共有三百三十二人咁多，真係不睇猶自可，一睇仲以為係一張高官俱樂部會員名單添。先睇最高榮譽大紫荊勳章，兩人中獎，行政會議召集人梁振英係其中一個。再睇金紫荊星章名單，十六人之中，高官及權貴就佔咗好多個席位，而且幾乎清一色係煲呔曾自己友，包括「史上最失敗」嘅環境局局長邱騰華、對樓價飆升束手無策嘅運輸及房屋局局長鄭汝樺、因病辭官嘅商務及經濟發展局局長劉吳惠蘭，加埋行會成員劉遵義同胡紅玉，一隻手掌啱啱數晒。

至於呢班高官權貴憑乜嘢獲此殊榮，港府嘅解釋不外乎「社會服務成績斐然」等等，毫無新意。不過，功夫茶唔明嘅係，高官由納稅人供養，高薪厚祿，絕對唔係無私奉獻做義工，點解仲可以攞勳章？再講，就算將授勳當係額外獎賞，但係好對唔住，功夫茶橫睇掂睇左睇右睇，都睇唔出點解要頒畀呢幾位高官喎。

就以邱騰華為例吖，推行政策掂嗰樣衰嗰樣，停車熄匙、膠袋稅、擴建堆填區，次次都搞到滿城風雨，頒個「史上最失敗局長星章」畀佢就差唔多。至於鄭汝樺咯喎，最啱梗係攞「火星最佳市民星章」啦，眾所周知，鄭局長不食人間煙火，曾經被人嘲諷住喺火星。

以前話「殺人放火金腰帶」，家陣有「高官權貴金紫荊」，都係反映公義得唔到彰顯，賞罰不公。嗱嗱嗱，高官無德無能都攞勳章，反而一班流血流汗為港爭光嘅香港運動員，最多只係獲頒榮譽勳章，重傷不下火線嘅單車女將黃蘊瑤更加只獲行政長官社區服務獎狀。唉，呢份不知所謂嘅授勳名單，叫人點樣信服！

不過，話時話吖，年年授勳，行禮如儀，高官權貴關起門來一家親，早已見怪不怪囉，講到底，港府授勳根本就係政治分餅仔遊戲。人哋話太公分豬肉，人人有份，而煲呔曾授勳，係就係人人有份，不過唔係平民百姓人人有份，而係高官人人有份。所以呢，年年估錯數嘅財爺曾俊華亦曾經攞過大紫荊，連搞到香港公共醫療體系一塌糊塗嘅周一嶽亦一早分到個金紫荊星章，照咁睇，邱騰華同鄭汝樺今年至攞獎，都算失威囉。

咁啦，橫掂煲呔曾擺明益自己友，不如慳番啲工夫，以後喺大紫荊之上加多個超級庸官大勳章，專門頒畀班失職高官，咁就可以名正言順分豬肉，唔怕畀人話授勳唯親啦。