林公公早前通完波仔就即刻返工，佢搞替補機制，被形容為來去如風，咁搏命為乜呢？佢都算係特區近期嘅風雲人物，不！是惹火物體！替補機制一試水溫，一試激起千重浪，林公公果然充滿力量，叫成大堆學者義憤填膺，登報聯署抗議；一時教人沉默街頭，無聲咒惡法；一時又招惹大律師公會三度表態，促請政府撤回有關方案，認真有face。
林公公你係得嘅！老朽都好希望你唔係愈來愈似魏忠賢，而係三國時的虎將趙雲，一桿長槍，渾身是膽。姑勿論替補機制是否夠票匆匆通過，如此豁出去，理應有回報。
在一片烽火中，林公公上演唔到「千山我獨行，不必相送」的瀟灑場景，皆因風高浪急，佢亦非「浪裏白條」，必要時攞兩個水泡借多少浮力，亦屬人之常情。對於一刀切封殺補選，律政司司長幫手頂一頂，話辭職再選濫用程序，除浪費公帑亦剝奪選民被代表權利，損害選舉制度的莊嚴性，之不過被問及是否憑良心行事，佢就沒回應喇。
另一位為佢頂硬上表態嘅就係煲呔曾。煲呔曾聲言推出替補機制是回應市民的訴求云云。喂！如今政府推呢壇嘢好似滾水淥腳，連諮詢都唔做，唔該咪亂擺市民上枱啦。如果政府有尊重民意，回應市民訴求，香港就唔會沉淪成咁，一眾高官民望就唔會插水。你哋自己腦殘，咪當市民都有認知障礙至得㗎！
煲呔曾，在一片叫你下台的怒潮中，願你反思「君子居易以俟命，小人行險以徼幸」的道理。