最近內地孕婦來港產子問題鬧得熱烘烘，食物及衞生局局長周一嶽先至限制內地孕婦來港分娩配額，表面上周一鑊處理呢個問題責無旁貸，但要負上更大責任嘅係另有其人。疑似特首候選人、行政會議召集人梁振英（CY）尋日就以「入境政策是人口政策的關鍵」為題喺報章撰寫文章，暗寸負責人口政策嘅政務司司長唐英年（唐唐）喺處理人口政策上「交白卷」。
CY喺文章中話，內地孕婦來港產子問題，凸顯咗全面制訂同執行人口政策嘅重要性及迫切性，而喺文章最後一段，佢仲一針見血話內地孕婦來港產子嘅人數不斷增加，表面上對醫療服務造成壓力，但實質係人口政策問題。CY咁講，明眼人一睇就知有弦外之音，暗寸唐唐先至係問題嘅罪魁禍首。
唐唐、CY同樣疑似特首候選人，CY借勢寸爆對手可以理解，但CY啱啱先至獲唐唐擔任主席嘅授勳委員會頒授勳章，莫非CY不甘被「河蟹」而收口？