政情：發叔食荔枝谷多幾把火？
政府鐵腕處理村屋僭建搞到新界人㷫合合，向來處事以平衡各方利益嘅鄉議局主席劉皇發，就被鄉紳批評處事態度過分軟弱，冇啲火氣。不過班鄉紳唔使擔心，事關發叔尋日透露，佢今年暑假會一如往年湊埋孫仔孫女一齊返惠州歎荔枝，每次起碼食夠一斤先停到口。一粒荔枝三把火，莫非發叔想補充番啲火氣？
除咗鍾意食荔枝外，原來發叔仲鍾意將荔枝浸酒飲。嘩！就咁食都燥到㷫合合，仲飲埋荔枝酒，真係熱上加熱，分分鐘燥到流鼻血，莫非佢想同班鄉紳一齊搞「流血革命」？不過，發叔好幽默話，佢老人家無火唔怕熱，但為免上火，佢每次食親荔枝都會飲鹽水降火，所以食一斤都唔怕熱氣喎。
雖然發叔被鄉紳批評處事軟弱，但佢曾喺周二上千鄉民包圍立法會前夕，罕有強硬警告政府唔好亂咁嚟，否則肯定會造成災難性局面。忽然咁狠，唔知嗰日係咪食完荔枝，唔記得飲鹽水降火呢？