政情：陳茂波未表態受狙擊
特區政府硬推替補機制認真累街坊！話說唔少建制派立法會議員至今未明確表態係咪支持，屬其中一位未表態嘅會計界議員陳茂波（Paul），尋日被三位泛民主派特首選委會委員發公開信挑戰，質疑阿Paul冇盡好立法會議員嘅責任，大鬧佢失敗。三人鬧得咁狠，雖然未知係咪同嚟緊選委會選舉或下屆立法會選舉有關，但阿Paul真係要醒定啲喇。
會計界選委梁繼昌、韋志堅及甄文星尋日發公開信話，阿Paul就今次替補機制爭議發表咗矛盾意見，佢哋對此非常失望，因為身為會計界議員嘅阿Paul，本來就有責任明確表態，同埋反映選民意願，可惜阿Paul做唔到呢兩大重任。之後佢哋喺信中再大鬧一輪替補機制後，呼籲阿Paul投下反對票。
話時話，據講梁繼昌一度想喺○八年參選立法會會計界，同阿Paul一決高下，後來決定唔選，由當時仲係公民黨黨員嘅譚香文出選。如今梁繼昌開火，莫非想挑戰阿Paul？