政情：煲呔曾戀棧權位

「劣績」籮籮 剛愎自用

還記得○三年五十萬人上街反對，老董仲要係○五年以腳痛為名下台，當時市民都以為一天都光晒，送走「老懵董」之後會有好日子過，點知呢個世界係「一蟹不如一蟹」，自詡為政治家嘅煲呔曾自○七年坐正後，一直剛愎自用，淨係識得用啲蠶蟲師爺嘅政治化裝術為拙劣施政塗脂抹粉。若要數煲呔曾嘅「劣績」真係一匹布咁長，包括生果金入息審查、副局長國籍風波等單單都搞到滿城風雨，被全城鬧爆。煲呔曾面對個人醜聞亦係死不認錯，好似○九年慳電膽計劃疑似益親家風波，甚至係最近違例將半山豪宅圍封僭建嘅事件，佢都係死撐拒絕「認衰」，淨係識得閃閃縮縮咁等時間去淡化事件。

頭髮蓬鬆 致辭講錯嘢

不過，煲呔曾不但冇自我反省，淨係識也文也武做埋啲唔等使嘅嘢，就尋日升旗禮，佢就喺儀式前嘥咗好多時間，懶親民咁四周圍同市民握手傾偈，吹到頭髮蓬鬆，之後連頭髮都懶梳就去為七一酒會致辭，仲當住中外傳媒面前，將特區成立十四周年講成係「十周年」，忽然回到過去，但佢冇即時更正，貽笑大方之餘，完全反映佢嘅心底話，再想做多五年。

煲呔曾不但唔覺自己講錯嘢，之後祝酒時好失禮咁大啖狂「隊」香檳，好似臨別秋波借酒消愁咁款。煲呔曾一方面戀棧權位，一方面又面對任期屆滿及被要求落台嘅壓力，與其做得咁辛苦，倒不如順應民意，知所進退提早下台返屋企專心養錦鯉、弄孫為樂，好過經常被政黨同市民追殺咁無癮啦！