中環出更：馬鴻銘囡囡開飯發施號令
佳寧娜飲食集團太子爺馬鴻銘（John）同玩具大王蔡志明千金蔡加敏結婚後，話咁快成為「3B之父」。其中三歲大女馬靄翹好有大家姐風範，連公公蔡志明、爺爺馬介璋嘅飲食都
到實一實。
有子萬事足嘅John，尋日以廣東社團總會副主席身份入馬場為盃賽打氣，講起一對五個月大孖仔就笑唔停。阿John係潮州人，以為佢會重男輕女啦，點知啱啱相反，佢坦言錫大女多過一對孖仔，一見靄翹撒嬌就「投降」。
阿John心思思追多個
人仔細細嘅靄翹好懂事，除咗幫手照顧細佬外，仲識得關心長輩，每次食飯，如果公公、爺爺在場，佢會主動叫兩老埋位。當見到兩老忙於工作，遲遲唔埋位，靄翹會扁嘴話唔得，以鬼馬口脗話：「No！Now！」認真搞笑。
靄翹暑期後入讀名牌幼稚園，阿John話，囡囡全憑實力考入學校，無靠人事關係，令佢好欣慰。
大女咁可愛，令佢心思思想追多一個囡囡，但佢強調，會尊重老婆大人意見，事關佗B超辛苦喎！