政情：新大樓就入伙議員心急搵食
立法會新大樓暑假就入伙，不過到依家都仲未搵到肯為佢哋提供飲食嘅人，上周二立法會行政管理委員會開會，急謀出路，身為飲食界立法會議員嘅張宇人一言驚醒夢中人，佢話業界好少會落標，鍾意面談同埋被邀請多啲，大家依家有佢做指路明燈，即時叮一聲醒咗，大家拿拿臨物色咗五間飲食集團。
放寬條件 免指定菜式
其實今次立法會新大樓飯堂招標都搞咗好耐，之前佢哋要求多多，又要有指定菜式又要限制價錢，又訂明合約期得四年，規矩多多，做生意嘅嘢，又唔係實賺，試問邊個肯制？為免無飯食，最終班食慣好嘢嘅議員都要「跪低」，將條件放寬，投標嘅餐廳可免交管理費同投標費，亦無再出現指定菜式嘅菜單同指定價錢，中標食肆只交水電煤費，自己負責枱櫈同人手嘅費用就OK。
早輪終於有一間肯入標，不過啲質素呢……食到佢哋個個嘴都歪埋咁滯，依家佢哋主動出擊，希望有人肯制喇。不過話時話，好多尊貴嘅議員食慣好嘢，出名嘴刁識食，今次揀呢五間怕唔會係啲咩名人食店、富豪飯堂啩？！