政情：楊華勇訂造輪椅送坎坷女童
「百仁基金」副主席楊華勇（Johnny）向來予人公子哥兒感覺，查實Johnny不知幾細心，佢早前從報章得悉身患腦麻痹女童晴晴突然失去父親，遺下佢同母親相依為命，二話不說自掏腰包，訂製一部多功能輪椅送畀佢。
Johnny周一聯同「百仁」會員，包括廖創興家族後人廖偉麟、已故富商張祝珊家族後人許明明及羅氏針織後人羅穎怡，將輪椅送去紅十字會甘迺迪中心。晴晴睇見，感動到眼濕濕：「新輪椅比我屋企張梳化仲舒服！」Johnny聽見，差啲流下男兒淚。
最緊要啱用 唔講幾多錢
張新式輪椅喺外國度身訂造，由於部分零件並非大量生產，所以要等足一年。新椅背部承托力更強，角度可自由調校，讓晴晴坐姿更固定和舒適。張椅幾多錢？Johnny就話唔講嘞，最緊要晴晴啱用。晴晴媽咪話，有新輪椅幫助，照顧囡囡更輕鬆。放低女兒外出工作，都可以安心啲。