繼最低工資立法後，競爭法又再觸動商界嘅神經，尋日「五散人」之一嘅林大輝喺立法會動議辯論保障中小企經營和發展空間時，就借勢狠批署理商務及經濟發展局局長蘇錦樑（Greg）處理競爭法搞到一鑊泡，又成日唔嚟開會，仲質疑對方唔識解釋條例，只會對中小企造成更多白色恐怖喎。總之大輝形容競爭法係「大老虎打不成，中小企被開刀，市民亦沒有因而得益」。
動議辯論中，大輝又狠批財經事務及庫務局局長陳家強（傻強）．鬧佢面對過時、有問題嘅稅務條例39E時，依然麻木不仁唔願意作出修改，繼續抱着「少做少錯，唔做無錯」嘅官僚心態處理事件。大輝坦言大家都知工商業北移係大勢所趨，根本同避稅係無關。
大輝最後忍唔住直斥傻強係個好偽善嘅官員，成日口口聲聲話好鍾意聽工商、會計同稅務專家嘅意見，實際上連稅務聯絡小組嘅意見都唔肯聽，簡直閉門造車，充滿官員霸權思維，漠視中小企生死喎。