政情：梁太呻睇唔通外圍經濟
歐洲債務危機何時了，睇怕經濟專家都未必睇得通，就連恒生銀行副董事長兼行政總裁梁高美懿都話唔識睇。梁太早幾日出席活動時，講到歐洲債務危機，佢話德國一時又話支持希臘解決債務危機，一時又話唔支持，都唔知想點，所以佢唔識睇喎。
香港背靠祖國，面向世界，所以梁太話香港嘅影響有兩個層面，除咗歐洲債務之外，仲有內地對香港影響，好似內地銀行存款準備金率已上調到百分之廿一點五，睇怕下個月又再上調，心理影響都好大，加上近日港股又跌咁多，連帶樓市都有影響，但只係一個正常調整。
王忠桐嘆港難自救
王氏港建主席王忠桐前晚去馬場時，都話好認同內地影響香港經濟，因為依家本港面對高通脹問題，但面對人民幣升值，所以要靠本港自己解決都好困難喎。