政情：何君堯押重注闖立會

本身為新界原居民嘅何君堯，早前成功挑戰鄉議局主席劉皇發，迫使發叔讓出其盤據四十年嘅屯門鄉事委員會主席寶座，其後更心雄挑戰埋屯門區議會主席，無奈最終鎩羽而歸。唔少鄉紳都知道何君堯唔簡單，仲估計佢會喺下屆鄉議局競逐正、副主席之位，所以聽到佢尋日呢番豪氣說話都打咗個突。

勸鄉議局「見好就收」

不過，何君堯係醒目仔，講得呢番說話，相信算過度過。何君堯早前已明言有意喺新界西落戶，透過直選洗禮進身立法會。家陣僭建風暴愈演愈烈，唔少市區居民都對班鄉紳有微言，認同港府應企硬執法，已經唔多同情佢哋，更唔好話去支持佢哋所謂嘅「流血抗爭」。何君堯高調勸鄉議局「見好就收」，睇怕都係權衡輕重後，藉此抓緊市區人嘅選票。

況且，林鄭早已多次重申，港府無論針對市區定係新界嘅村屋僭建問題，執法都一定要一視同仁，絕唔會考慮特赦，又強調鄉議局根本冇法律基礎去推翻政府呢個決定。何君堯啱啱先上任為律師會會長，如果佢喺呢個時候力撐班鄉紳搞對抗，隨時會影響到個人嘅專業形象，甚至搞到自己一身蟻，被人質疑佢做律師會會長都唔尊重法律，照計佢點都唔會同自己過唔去啩？

正如鄉紳嘅估計，何君堯下屆問鼎鄉議局主席，絕對不足為奇，但鄉議局要四年後先至再換屆，所以爭取鄉紳間嘅支持並非當前急務，幫自己搞多啲形象工程，為下年嘅立法會選舉熱身至係正事，難怪佢唔賣帳畀班鄉紳，唔同佢哋一齊搞「抗爭」啦！