中環出更：方文雄預言舖租快逆轉
香港樓價高不可攀，各界復建居屋嘅呼聲愈嚟愈高，不過，遠水救唔到近火，市民惟有自求多福。中華總商會副會長方文雄都話，就算政府決定復建居屋，都要兩、三年後至有供應，所以住宅樓價短期內好難回落。反而商舖租金市道好快有逆轉，泡沫化嘅情況將放緩，相信商家嘅成本壓力可以稍獲紓緩。
中總七區聯絡處尋晚喺佐敦龍堡國際酒店舉行「七‧一」酒會，中總榮譽會長張成雄、會長蔡冠深、副會長陳幼南、袁武以及今次搞手余鵬春等現身撐場。中總高層個個都係大忙人，余鵬春啱啱由梅州趕返香港，蔡冠深就由廣州返嚟，大家無論幾忙都要抽空撐自己場。
家族企業協成行旗下有好多收租物業嘅方文雄話，最近內地開始收緊信貸，銀行按揭及信貸亦趨於保守，令到企業同銀行借錢開始困難。如果銀根繼續抽緊，香港地產市道泡沫將慢慢減少。不過，呢個現象只限於商業物業，事關政府至今仲未正式宣布復建居屋，就算即刻動工復建，都要等兩、三年至有住宅供應。
余鵬春憂實施標準工時
裕華國貨係租金高企嘅受害者，裕華國貨董事副總經理余鵬春呻話，最近政府不停推出嘅新政策仲弊，例如最低工資令成本不斷提高，依家又有呼聲要制訂標準工時，招招都切中商界要害。佢以實施標準工時嘅新加坡為例，裕華喺當地設有分店，但每逢過年等旺季，顧客仲買緊嘢，員工都冇彈性延長開舖時間，所以佢聽到呢個消息，顯得憂心忡忡。
講起做生意，家家有本難唸的經，不如大家一齊向北看。蔡冠深近排就密密為會員開拓商機，呢兩日佢頻頻北上推動粵港合作，又喺廣州召開論壇探討大珠三角商機，雖然忙到飛起，但見到論壇勁受歡迎，乜辛苦都抵番喇！
卓妮